«Атлетико» ҳужумчиси Хулиан Альварес ёзги трансферлар ойнасида клубини алмаштириш ниятида ва у фаолиятини давом эттириш учун фақат «Барселона» вариантини кўриб чиқмоқда.

Журналист Маттео Мореттонинг маълум қилишича, аргентиналик футболчи бошқа таклифларга қизиқиш билдирмаяпти.

— Хулианнинг Англияга қайтиш нияти йўқ. Шунингдек, у «ПСЖ»га ҳам ўтишни истамайди — унинг ягона хоҳиши «Барселона»га ўтиш. Каталония клуби уни трансфер қилиш учун ҳаракат бошлайди. Энди улар 130-140 миллион евро атрофидаги маблағни таклиф қила оладими, шуни кўриш керак. Менимча, «Атлетико» ва «Барселона» ўртасида яна музокаралар бўлади.

Шунингдек, футболчининг «Атлетико»да қолиб кетиши эҳтимоли ҳам жуда паст. Хулиан ва жамоа бош мураббийи Диего Симеоне ўртасида муносабатлар яхши эмас, — деб ёзди Моретто X ижтимоий тармоғида.

Аввалроқ ҳам Альвареснинг «Барселона» қизиқишлари доирасида экани ҳақида хабарлар тарқалган эди. Агар трансфер амалга ошса, у каталонияликлар учун сўнгги йиллардаги энг қиммат харидлардан бирига айланиши мумкин.