Ҳимоячи Алессио Романьоли расман «Лацио»ни тарк этди ва фаолиятини Қатарнинг «Ас-Садд» клубида давом эттиради.

Таниқли инсайдер-журналист Жанлука ди Марционинг маълумотига кўра, 30 ёшли италиялик футболчи Қатар клуби билан аллақачон шартнома имзолаб бўлган. Яқин соатлар ичида у тиббий кўрикдан ўтади.

Романьоли сўнгги 4 мавсумни «Лацио»да ўтказди ва Маурицио Сарри қўл остида ҳимоя чизиғининг асосий фигураларидан бири эди. Ортда қолган 2025/2026 йилги мавсумда у барча турнирларда 37 та ўйинда майдонга тушди (А Серияда 32 та ва Италия Кубогида 5 та) ва 1 та гол урди — ушбу ягона голини Кубок ярим финалининг жавоб баҳсида «Аталанта» дарвозасига киритганди.

Бошқа манбаларнинг хабар беришича, ушбу трансфер учун «Лацио» тахминан 3 миллион евро товон пули олади, Романьолининг янги клубидаги йиллик маоши эса 6 миллион еврони ташкил этади.