Ярим ҳимоячи Арда Гюлер Жаҳон чемпионати — 2026 турнирида Туркия терма жамоасининг голларини очиб берди.
Мадриднинг "Реал" клуби футболчиси АҚШ терма жамоасига қарши кечаётган гуруҳ босқичи 3-тур учрашувининг 10-дақиқасида гол уриб, таблодаги ҳисобни 1:1 кўринишига келтирди. Opta берган маълумотларга кўра, Гюлер 21 ёш-у 120 кунлигида мундиаллар тарихида Туркия терма жамоаси сафида гол урган энг ёш футболчига айланди. Арда бу борада ЖЧ-2002 мусобақасида Коста-Рика дарвозасини 21 ёш-у 275 кунлигида ишғол этган Эмре Белёзоғлунинг рекордини янгилади.
Эслатиб ўтамиз, Туркия терма жамоаси дастлабки икки турда Австралия (0:2) ва Парагвайга (0:1) имкониятни бой бериб, ЖЧ-2026 плей-офф босқичига чиқиш имкониятидан муддатидан аввал маҳрум бўлган эди.
