«Барселона»нинг собиқ ҳужумчиси Луис Суарес Ханс-Дитер Флик қўл остидаги жамоага баҳо берди. Уругвайлик футболчи «кўк-анорранглилар» уни ҳайратда қолдираётганини тан олди.

«Фликнинг «Барселона»си ҳайратланарли даражада. Ҳақиқат шундаки, ҳар йили бир хил гапни гапиришади: улар суръатга дош бера олишмайди, юқори прессингга қарши тура олишмайди, бундай юқори ҳимоя чизиғи уларни қийнаб қўяди... Шунга қарамай, улар буни давом эттиришмоқда.

Жамоа натижа беришда давом этмоқда. Флик футболчиларга жуда яқин мураббийдек кўринади. У очиқ гапиради, уларга ҳақиқатни айтади. Агар ўйинчилардан кимдир учрашувда майдонга тушмаса, у буни тушунтиради ва сабабларини келтиради. Бу эса футболчилар учун жуда муҳим», — деди Суарес.

Ортда қолган мавсумда «Барселона» Испания чемпиони ва мамлакат Кубоги соҳибига айланди.