«Комо» ярим ҳимоячиси Николас Паснинг отаси Пабло Пас футболчининг Италияда қолиш қарорига муносабат билдирди.

Аввалроқ «Реал» Паснинг шартномасидаги 9 миллион евролик қайта сотиб олиш бандини фаоллаштиргани, бироқ кейинроқ футболчини яна «Комо»га 60 миллион евро эвазига сотиб юборгани маълум бўлган эди.

— «Комо» — у учун энг яхши вариант. Нико «Комо» таркибида Чемпионлар лигасида ўйнашни жуда ҳам хоҳлаганди. Биз бу танловдан жуда хурсандмиз. Шунга қарамай, «Реал» кейинги йилда Никони қайта сотиб олиш ҳуқуқини ўзида сақлаб қолган, — деди Пабло Пас Sky Sport нашрига берган интервьюсида.

Якунланган мавсумда 21 ёшли Пас барча турнирларда жами 40 та учрашувда майдонга тушиб, 13 та гол урди ва 8 та голли узатмани амалга оширди.

«Комо» Италия чемпионатининг 2025/26 йилги мавсумини тўртинчи ўринда якунлаб, ўз тарихида илк бор Чемпионлар лигаси йўлланмасини қўлга киритган эди.