«Наполи» тез орада жамоа ярим ҳимоячиси Скотт Мактоминейга янги шартнома таклиф қилади. Бу ҳақда Football Italia нашри хабар бермоқда.
Нашр маълумотларига кўра, Неаполь клуби президенти Аурелио Де Лаурентис ва жамоа спорт директори Жованни Манна яқин ҳафталарда шотландиялик футболчи билан янги келишув шартларини муҳокама қилиш учун учрашув ўтказишади. Футболчининг амалдаги шартномаси 2028 йилга қадар мўлжалланган.
Аввалроқ Мактоминей Шотландия терма жамоаси таркибида «C» гуруҳида учинчи ўринни эгаллаган ҳолда ЖЧ-2026 мусобақасини тарк этган эди.
Хавбек «Наполи»га 2024 йилнинг ёзида «Манчестер Юнайтед»дан ўтган эди. 2025/2026 йилги мавсумда Мактоминей клуб сафида барча турнирларда 44 та ўйинда майдонга тушиб, 14 та гол урди ва 4 та голли узатмани ўз ҳисобига ёздириб қўйди. Transfermarkt портали маълумотларига кўра, футболчининг трансфер қиймати 40 миллион еврони ташкил этади.
