Матбуот анжуманининг иккинчи қисмида Ўзбекистон терма жамоаси бош мураббийи Миржалол Қосимов иштирок этди.

“Тўғрисини айтсам, кўп гапиришнинг кераги йўқ. Мухлислардан мағлубият учун узр сўрайман. Йигитларга эса раҳмат айтаман. Мухлисларни хурсанд этиш учун қўлимиздан келган барча ишни қилдик. Барча абйни ўзимга оламан”, дея ўз сўзини бошлади тушкун кайфиятдаги М.Қосимов.

“Мен ўзим ЎФФ раҳбариятидан истеъфо сўрайман. Ўз олдимизга мақсадга ета олмадик. Имкониятлардан фойдалана олмадик. Эртадан бошлаб кейинги саралаш ўйинларига тайёргарликни бошлаш керак. Терма жамоага эса янги қон керак. “Жамоа ютса барча ютади, жамоа ютқазса мураббий ютқазади” деган гап бор. Бор гап шу”, дейди бугундан бошлаб терма жамоанинг собиқ бош мураббийига айланган мутахассис.

“Фақат Осиё кубогини ўйламасдан, кейинги ЖЧ ҳақида ўйлаш керак. Ушбу ЖЧга чиқиш учун қаттиқ курашдик. Бундай тарзда имкониятни қўлдан чиқариш аламли. Мухлислар бизни қизғин қўллаб-қувватлашди. 2005 йилда бўлгани каби бу сафар ҳам мақсадга ета олмадик. Айбни яна бир марта ўзимга олган ҳолда, истеъфога чиқишимни таъкидлайман”, дейди Қосимов.

“Футболчиларга ҳеч қанақа эътирозим йўқ. Йигитлар имкон қадар жонларини бериб ҳаракат қилишди. Гуруҳ баҳсларида ҳам, бугун ҳам охиригача ўйнадик”, дея барча айбни ўз зиммасига олди “Бунёдкор” бош мураббийи.