Англиялик мутахассис Лиам Росеньор яқин вақт ичида «Париж» бош мураббийига айланади. «L'Équipe» нашри хабарига кўра, расмий эълон пайшанба куни, 42 ёшли мураббий яна бир йилга узайтириш имконияти билан икки мавсумга мўлжалланган шартномани имзолаганидан кейин кутилмоқда.

Манба берган маълумотларга кўра, клуб раҳбарияти бир неча ҳафталик музокаралардан сўнг якуний танловни Росеньорда тўхтатган. «Париж»да унинг футболчиларга нисбатан талабчанлиги ва «Страсбург»даги фаолияти давомида намойиш этган ҳужумкор ўйин услубига содиқлиги юқори баҳоланмоқда.

Росеньор учун бу «Челси»даги муваффақиятсиз даврдан кейин фаолиятини қайта тиклаш имконияти бўлади. Англиялик мутахассис Лондон клубида тўрт ойдан камроқ вақт ишлади ва 23 та учрашувда бор-йўғи 10 та ғалабага эришди.

Росеньор сўнгги бир йил ичида «Париж»нинг учинчи бош мураббийига айланади. Уни тайинлашдан олдин клуб Стефан Жийи билан хайрлашди ва шартномаси яна бир йилга мўлжалланган Антуан Комбуаре билан боғлиқ масалани деярли ҳал қилди. Ўтган мавсумда «Париж» ўн биринчи ўринни эгаллаган эди.