“Манчестер Сити” клуби “Лилль” ҳамда Марокаш миллий жамоаси ярим ҳимоячиси Айюб Буадди бўйича дастлабки музокараларни ўтказди. Инглиз клуби раҳбарияти футболчи келажакда жамоанинг етакчиларидан бири бўлишига ишонмоқда. Шу боис ушбу трансферни амалга оширишни мақсад қилган. Бу ҳақда таниқли инсайдер Фабрицио Романо ўзининг ижтимоий тармоқдаги саҳифасида хабар берди.

Манбага кўра, айни пайтда Айюбга Европанинг тўртта клуби қизиқиш билдирмоқда. Улар қаторида “ПСЖ” ҳам бор, бироқ парижликлар эътиборини бошқа трансферларга қаратгани сабабли марокашлик футболчини сотиб олиш бўйича музокараларни вақтинча тўхтатган. “Манчестер Сити” эса унга жиддий қизиқиш билдирмоқда. Клуб раҳбарияти уни харид қилган тақдирда ҳам, 2027/2028 йилги мавсум бошлангунига қадар яна “Лилль”да қолдириш режасини кўриб чиқмоқда.

Эслатиб ўтамиз, Айюб Буадди айнан “Лилль” тарбияланувчиси ҳисобланади. Ярим ҳимоячи ўтган мавсум жамоа сафида жами 42 та ўйинда майдонга тушиб, 1 та голли узатмага муаллифлик қилган. Футболчи айни пайтда Марокаш миллий жамоаси сафида ЖЧ-2026 да иштирок этмоқда. Турнирнинг 1/16 финалида Марокаш Нидерландия устидан ғалаба қозонди (асосий ва қўшимча вақт — 1:1, пенальтилар сериясида — 3:2). Энди жамоа 4 июль куни 1/8 финал доирасида Канада билан куч синашади.