«Ливерпуль» ўзининг расмий сайтида Франциянинг «Ренн» клуби марказий ҳимоячиси Жереми Жаке билан шартнома имзолаганини маълум қилди. 20 ёшли футболчи клуб билан 2031 йилнинг ёзига қадар мўлжалланган шартномага имзо чекди.

«Мен жуда хурсандман. Дастлабки таассуротлар ажойиб, ниҳоят шу ерда эканлигимдан бахтиёрман. Клуб базасини кўрганимда, ўзимни дарҳол шу ерда тасаввур қилдим. Ўзимни қулай ҳис қиляпман ва мавсум бошланишини интиқлик билан кутяпман. «Ливерпуль»дек буюк клубда тўп суриш мен учун катта орзу эди», — дея Жакенинг сўзларидан иқтибос келтирмоқда «Ливерпуль» расмий сайти.

Жаке — «Ренн» клуби тарбияланувчиси ҳисобланади. У Франция клубининг асосий жамоаси сафида 33 та ўйинда майдонга тушган бўлиб, уларнинг 21 таси 2025/2026 йилги мавсумга тўғри келади. Февраль ойида унинг мавсумдаги иштироки елкасидан олган жароҳати сабабли узилиб қолган эди. Ҳимоячи, шунингдек, ижара асосида «Клермон» клуби сафида ҳам 24 та ўйинда иштирок этган. Жакенинг «Ливерпуль»да қайси рақам остида тўп суриши кейинроқ эълон қилинади.