Япония терма жамоаси ярим ҳимоячиси Даичи Камада Жаҳон чемпионатини тарк этганидан сўнг ўз келажаги ҳақида гапирди.

Японияликлар турнирдаги иштирокларини 1/16 финал босқичида Бразилияга 1:2 ҳисобида имкониятни бой бериб якунлашди. Камаданинг «Кристал Пэлас» билан шартномаси 30 июнь куни ўз ниҳоясига етди.

«Очиғини айтсам, мен учун «Кристал Пэлас»дан устунроқ фақат топ-клублар бор, холос. Биз еврокубокларда ўйнаяпмиз, бу — Лондон. Оилам бу ердаги ҳаётга тўлиқ кўникиб бўлган. Барча омилларни ҳисобга олсак, «Кристал Пэлас»дан яхшироқ клуб топиш жуда қийин», — дея футболчининг сўзларини келтиради Soccer Digest нашри.

«Ҳозирги вақтда Англия чемпионатида тўп суриш мен учун Чемпионлар лигасида ғолиблик учун курашиш билан бир хил аҳамиятга эга. Ҳа, ҳали ҳеч нарса ҳал бўлгани йўқ, лекин мен вазиятга айнан шундай нигоҳ билан қарамоқдаман», — дея қўшимча қилди Камада.

Камада «бургутлар» сафида 2024 йилдан буён тўп суриб келмоқда. У жамоа билан бирга Англия Кубоги ва Суперкубогини, шунингдек, УЕФА Конференциялар лигасини қўлга киритган.