«Рома» клуби қанот ҳужумини кучайтириш устида ишлашда давом этмоқда. Журналист Альфредо Педулланинг берган маълумотига кўра, римликлар «Челси»га тегишли бўлган вингер Алехандро Гарначонинг хизматларига қизиқиб қолишган.

«Рома» раҳбарияти футболчи бўйича дастлабки маълумотларни сўраб улгурди, улар биринчи навбатда ижара вариантини кўриб чиқишмоқда. Охирги бир ой ичида Гарначога бир қатор таниқли клублар, жумладан «Милан» ва «Ювентус» ҳам қизиқиш билдирган эди.

Аргентиналик футболчи ўтган ёзда тахминан 45 миллион евро эвазига Лондон клубига кўчиб ўтган эди. Якунланган мавсумда у барча мусобақаларда 43 та учрашувда майдонга тушиб, 8 та гол урди ва 4 та голли узатмани амалга оширди.