«Барселона»нинг ўнг қанот ҳимоячиси Жюль Кунденинг номи «Манчестер Юнайтед»га ўтиш билан боғланмоқда.

TEAMtalk нашрининг хабар беришича, «қизил иблислар»га ёзги трансфер ойнасида франциялик футболчини сотиб олиш имконияти таклиф қилинган. «Кўк-анорранглилар» 27 ёшли футболчи учун 60 миллион евродан кўпроқ маблағ талаб қилиши тахмин қилинмоқда. Бироқ манкунианликлар ҳозирча бу трансферга катта қизиқиш билдиришгани йўқ, чунки жамоанинг айни дамдаги устувор вазифаси — мудофаанинг чап қанотини кучайтириш ҳисобланади.

Маълумот учун, Жюль Кунде 2022 йилдан буён «Барселона» шарафини ҳимоя қилиб келмоқда. Якунланган мавсумда у Ханси Флик қўл остида барча турнирларда 47 та учрашувда майдонга тушиб, ўз ҳисобига 3 та гол ва 4 та голли узатмани ёздириб қўйган.