«Barselona»ning o‘ng qanot himoyachisi Jyul Kundening nomi «Manchester Yunayted»ga o‘tish bilan bog‘lanmoqda.
TEAMtalk nashrining xabar berishicha, «qizil iblislar»ga yozgi transfer oynasida fransiyalik futbolchini sotib olish imkoniyati taklif qilingan. «Ko‘k-anorranglilar» 27 yoshli futbolchi uchun 60 million yevrodan ko‘proq mablag‘ talab qilishi taxmin qilinmoqda. Biroq mankunianliklar hozircha bu transferga katta qiziqish bildirishgani yo‘q, chunki jamoaning ayni damdagi ustuvor vazifasi — mudofaaning chap qanotini kuchaytirish hisoblanadi.
Ma’lumot uchun, Jyul Kunde 2022 yildan buyon «Barselona» sharafini himoya qilib kelmoqda. Yakunlangan mavsumda u Xansi Flik qo‘l ostida barcha turnirlarda 47 ta uchrashuvda maydonga tushib, o‘z hisobiga 3 ta gol va 4 ta golli uzatmani yozdirib qo‘ygan.
