«Ювентус» ҳужумчиси Лоис Опенда трансферга қўйилди, деб ёзмоқда Gazzetta dello Sport нашри.

Хабар қилинишича, туринликлар футболчи бўйича «Ланс», «Лион», «Ренн» ва «Ковентри» клубларидан таклифлар олиб улгурган.

Ҳужумчи ўтган ёзда «Лейпциг»дан мажбурий сотиб олиш шарти билан ижарага олинган эди ва мавсум якунида трансфернинг умумий қиймати «Юве»га 46 миллион еврога тушди.

Ушбу келишув «Ювентус» учун ҳақиқий фалокатга айланди, чунки Опенда 34 та ўйинда бор-йўғи иккита гол ура олди, холос. Бельгиялик футболчи 2025 йилнинг декабридан бери гол ура олмади, қолаверса, мавсумнинг сўнгги 11 та учрашувида майдонда бор-йўғи тўрт дақиқа ҳаракат қилди.

Қайд этилишича, «Ювентус» футболчини кейинчалик сотиб олиш ҳуқуқи билан ижарага бериш вариантларини ҳам кўриб чиқишга тайёр.