Украиналик марказий ҳужумчи Артём Довбик пойтахтнинг «Рома» клубини тарк этмоқда. Ҳужумчи фаолиятини А Сериянинг бошқа бир вакили — «Женоа»да давом эттириши мумкин. Бу ҳақда таниқли инсайдер Джанлука ди Марцио хабар тарқатди.
Журналистнинг аниқлашича, Рим клуби футболчини кейинги мавсум якунига қадар ижарага беришга тайёр. Қолаверса, «Женоа» бош мураббийи Даниэле де Росси украиналик тўпурарни ўз жамоасида кўришни шахсан истамоқда ва уни кўндиришга ҳаракат қилмоқда.
Ўтган мавсумда 29 ёшли ҳужумчи Италия чемпионати доирасида 14 та учрашувда иштирок этди. Жароҳати сабаб бир неча ойни ўтказиб юборган Довбик ўз ҳисобига 3 та гол ва 1 та голли узатмани ёздириб қўйган.
Ҳозирги вақтда форварднинг трансфер бозоридаги баҳоси 15 миллион еврони ташкил этади. Унинг «Рома» билан амалдаги шартномаси 2029 йилнинг июнь ойи охиригача мўлжалланган.
