«Барселона» клуби ва Миср терма жамоаси ҳужумчиси Хамза Абделкарим ЖЧ-2026нинг 1/8 финалидан ўрин олган Аргентина терма жамоасига қарши бўлажак учрашув ҳақида ўз фикрларини билдирди.

Мисрликлар плей-оффнинг илк раундида пенальтилар сериясида Австралиядан устун келишган бўлса, аргентиналиклар қўшимча бўлимларда Кабо-Вердени мағлуб этишди (3:2).

– Жаҳон чемпионатида Мессига қарши ўйнашни орзу қилганмидингиз?

– Биз фақат биргина Мессига қарши эмас, балки бутун бошли Аргентина терма жамоасига қарши ўйнаймиз, – дея 18 ёшли футболчининг жавобини келтиради Barca Universal.

Маълумот учун, Хамза Абделкарим Миср терма жамоасининг ушбу мундиалдаги барча тўртта учрашувида захирадан майдонга тушди. Июнь ойида «Барселона» ушбу истиқболли форварднинг трансфер ҳуқуқини Қоҳиранинг «Ал-Ахли» клубидан сотиб олишга қарор қилгани маълум бўлган эди.