«Манчестер Сити» «Лестер Сити»нинг 16 ёшли вингери Жереми Монгани трансфер қилиш бўйича келишувга эришди. Бу ҳақда The Athletic журналисти Давид Орнштейн X ижтимоий тармоғида хабар берди.

Манба маълумотига кўра, трансфер қиймати 10 миллион фунт стерлинг (тахминан 11,7 миллион евро)ни ташкил этади. Бундан ташқари, шартномада 2,5 миллион фунт (2,9 миллион евро) миқдоридаги бонуслар ҳам кўзда тутилган. Шунингдек, «Лестер Сити» футболчининг кейинги трансферидан ҳам муайян улушга эга бўлади.

Аввалроқ Монгага бир қатор клублар қизиқиш билдирган эди. «Лестер Сити» Англия Премьер-лигасидан тушиб кетганидан сўнг харидорлар уни қўлга киритиш бўйича ҳаракатларни янада фаоллаштирди.

Ўтган мавсумда Жереми Монга «Лестер Сити» сафида барча мусобақаларда 30 та учрашувда иштирок этиб, 1 та гол урди ва 2 та голли узатмани амалга оширди. Transfermarkt портали футболчининг бозор қийматини 15 миллион евро деб баҳолаган.