«Рома» «Марсель» ҳужумчиси Мэйсон Гринвуд бўйича таклиф тайёрлаш учун клуб хўжайинларидан розилик олди. Бу ҳақда RomaPress хабар бермоқда.
Манбанинг маълумотларига кўра, 23 ёшли инглиз ҳужумчиси айни пайтда бошқа вариантларни кўриб чиқишни тўхтатиб турибди ва Рим клуби томонидан аниқ қадам ташланишини кутмоқда. Футболчига «Фенербахче» ва «Атлетико» ҳам қизиқиш билдирган эди, бироқ айнан «Рома» сўнгги кунларда музокаралар жараёнини тезлаштирди.
Corriere dello Sport нашрининг қайд этишича, римликлар бонуслар ва кейинги сотувдан фоизни ўз ичига олган ҳолда жами 45 миллион евро миқдорида маблағ сарфлашади.
Трансфер бўйича якуний қарор яқин 24 соат ичида қабул қилиниши кутилмоқда. Клуб ҳужумчининг Франция жамоасининг ўқув-машғулот йиғини қайдномасига киритилмаслигидан умид қилмоқда, бу эса битимни тезлаштириши мумкин.
