Аргентина терма жамоаси Жаҳон чемпионати 1/8 финалида Мисрга қарши майдонга тушади. Учрашувни ҳакам Франсуа Летексье бошқариб боради, бу эса, тарқалган миш-мишларга кўра, аргентиналикларга умуман ёқмаган.

Журналист Густаво Яррочнинг хабар беришича, «альбиселесте» (оқ-кўклар) лагеридагилар ФИФА бу ўйинни айнан француз ҳакамига топширишга қарор қилганига «ишона олмаяптилар».

Эслатиб ўтамиз, Аргентина ва Франция терма жамоалари 2022 йили Қатарда бўлиб ўтган сўнгги мундиал финалида тўқнаш келишган эди. Ўшанда Лионель Скалони шогирдлари 120 дақиқалик ўйиндаги 3:3 ҳисобидан сўнг, пенальтилар сериясида ғалабани қўлга киритишганди. Бу гал ҳам жамоалар бош соврин учун кечадиган ҳал қилувчи баҳсда ўзаро тўқнаш келишлари мумкин.

Аргентина — Миср учрашуви 7 июль куни бўлиб ўтади, ўйин Тошкент вақти билан соат 21:00 да бошланиши режалаштирилган.