Испания терма жамоаси бош мураббийи Луис де ла Фуэнте Португалия терма жамоаси ҳужумчиси Криштиану Роналду ҳақида ўз фикрларини билдириб ўтди.

Эслатиб ўтамиз, 6 июль куни Тошкент вақти билан соат 00:00 да Жаҳон чемпионатининг 1/8 финали доирасида Испания ва Португалия терма жамоалари ўртасидаги учрашув старт олади.

«Мен Роналдуга қойил қолишимни ҳеч қачон яширмаганман. Мен мана шундай характери, амбицияси ва ўзини ривожлантиришга бўлган интилиши кучли бўлган футболчилар ҳамда инсонларнинг мухлисиман. У ўзи яратиб улгурган буюк мерос билан чекланиб қолмасдан, ҳамиша кўпроғига эришишга ҳаракат қилади. Ўйин давомида уни бир сонияга ҳам, бирор бир вазиятда ҳам эътибордан четда қолдириб бўлмайди. Агар хавфли ҳудудда уни назорат қилмай қўйсангиз, у бир лаҳзада ҳамма нарсани ҳал қилиб қўйиши мумкин. Тўғрисини айтсам, у бизга қарши ўйнамаслигини афзал кўрган бўлардим, аммо ўйлайманки, у майдонга тушади», — дея испаниялик мутахассис матбуот анжуманида 41 ёшли форвард ҳақида гапирди.

Маълумот учун, Криштиану Роналду ЖЧ-2026 доирасида ўтказилган тўртта учрашувда ўз ҳисобига учта гол ёздириб қўйишга улгурди.