Испания терма жамоаси Жаҳон чемпионати 1/8 финали доирасида Португалияга қарши кечадиган баҳс олдидан кеча сўнгги машғулотини ўтказди. Куннинг асосий янгилиги вингер Нико Уильямснинг умумий гуруҳ машғулотларига қайтгани бўлди.
«Атлетик» клуби футболчиси жамоадошлари билан тенг шароитда ишлади. Бунинг эвазига бош мураббий Луис де ла Фуэнте турнир бошланганидан бери илк бор қайдномадаги барча футболчилар хизматидан фойдаланиш имкониятига эга бўлди.
Mundo Deportivo нашрининг хабар беришича, Уильямс ҳозирча учрашувни бошланғич таркибда бошлашга тўлиқ тайёр эмас, бироқ у ўйинни захира ўриндиғида бошлаши кутилмоқда.
Шунингдек, бундан олдин соғлиғида муаммоларга дуч келган Виктор Муньос ва Йереми Пино ҳам тўлиқ соғайиб, сафга қайтишган.
Эслатиб ўтамиз, Испания ва Португалия терма жамоалари ўртасидаги учрашув 6 июль куни Тошкент вақти билан соат 00:00 да старт олади.
