«Лион» ярим ҳимоячиси ва сардори Корентен Толиссо яқин вақт ичида клуб билан янги шартнома имзолайди. Бу ҳақда «L'Équipe» нашри хабар бермоқда.

Манбанинг маълумотларига кўра, амалдаги шартномаси 2027 йилнинг ёзига қадар мўлжалланган 31 ёшли футболчи клуб раҳбарияти билан битимни яна икки мавсумга узайтириш борасида келишиб олган. Расмий имзоланиш ҳафта бошида кутилмоқда.

Янги келишувнинг асосий шарти футболчининг маоши камайтирилиши бўлади. Сўнгги вақтларда «Лион» молиявий муаммоларга дуч келди, бунинг оқибатида жамоа ҳатто Лига 1 иштирокчилари сафидан четлаштирилиш хавфи остида қолганди. Якунда клубнинг маошлар фонди ва трансфер харажатларига нисбатан қатъий чекловлар жорий этилди.

Ўтган мавсумда Толиссо Франция чемпионатида 30 та ўйинда майдонга тушиб, 11 та гол урди ва 4 та голли узатмани амалга оширди.