«Lion» yarim himoyachisi va sardori Korenten Tolisso yaqin vaqt ichida klub bilan yangi shartnoma imzolaydi. Bu haqda «L'Équipe» nashri xabar bermoqda.

Manbaning ma’lumotlariga ko‘ra, amaldagi shartnomasi 2027 yilning yoziga qadar mo‘ljallangan 31 yoshli futbolchi klub rahbariyati bilan bitimni yana ikki mavsumga uzaytirish borasida kelishib olgan. Rasmiy imzolanish hafta boshida kutilmoqda.

Yangi kelishuvning asosiy sharti futbolchining maoshi kamaytirilishi bo‘ladi. So‘nggi vaqtlarda «Lion» moliyaviy muammolarga duch keldi, buning oqibatida jamoa hatto Liga 1 ishtirokchilari safidan chetlashtirilish xavfi ostida qolgandi. Yakunda klubning maoshlar fondi va transfer xarajatlariga nisbatan qat’iy cheklovlar joriy etildi.

O‘tgan mavsumda Tolisso Fransiya chempionatida 30 ta o‘yinda maydonga tushib, 11 ta gol urdi va 4 ta golli uzatmani amalga oshirdi.