36 ёшли ҳимоячи Дейли Блинд катта эҳтимол билан Амстердамнинг «Аякс» клубига қайтади.
Нидерландиялик тажрибали футболчи келаси ҳафтанинг бошида эркин агент мақомида «Аякс» таркибига бориб қўшилади. Бу ҳақда ESPN нашри хабар бермоқда.
Кутилишича, Блинд жамоа бош мураббийи Мичел Санчесга ёрдам беради. Футболчи бундан олдин «Жирона» клубида айнан ушбу мутахассис қўл остида тўп сурган эди.
Дейли Блинд «Аякс» клуби тарбияланувчиси ҳисобланади. У катталар даражасида (асосий жамоада) 2008 йилдан 2014 йилгача ҳамда 2018 йилдан 2023 йилгача ушбу клуб шарафини ҳимоя қилган. Тажрибали ҳимоячи Амстердам клуби сафида жами 333 та учрашувда майдонга тушиб, 13 та гол ва 21 та голли узатмага муаллифлик қилган. Блинд «Аякс» билан биргаликда етти бор Нидерландия чемпиони бўлган, шунингдек, мамлакат Кубоги ва Суперкубогида икки мартадан зафар қучган.
