Мадриднинг «Реал» клуби Испания чемпионатининг янги мавсумини бошқа жамоаларга нисбатан кечроқ бошлайди.

Ла Лига раҳбарияти «қаймоқранглилар»нинг «Реал Сосьедад»га қарши биринчи тур учрашувини кўчиришга розилик берди. Мазкур баҳс аввал янги мавсумнинг илк ўйин ҳафталигида — 14–15 август кунлари ўтказилиши режалаштирилган эди.

Бундай қарор ЖЧ-2026 муносабати билан қабул қилинди. Испания футболчилари касаба уюшмаси мундиалнинг сўнгги босқичларида иштирок этадиган футболчиларга клубларига қайтишдан аввал мажбурий дам олиш муддати берилишини талаб қилди.

Ла Лига президенти Хавьер Тебаснинг маълум қилишича, ҳар бир футболчи жаҳон чемпионатидаги охирги учрашувидан кейин камида уч ҳафта дам олади. Шундан сўнг уларга янги мавсумга тайёргарлик кўриш учун яна уч ҳафта вақт берилади.

Шу сабабли Ла Лиганинг биринчи тури бир нечта саналарга бўлиб ўтказилади. «Реал» — «Реал Сосьедад» учрашуви эса иккинчи ва учинчи турлар оралиғида бўлиб ўтади.

Бу қарорга мадридликлар сафидаги бир нечта футболчи ҳали ҳам ЖЧ-2026да иштирок этаётгани ҳам таъсир кўрсатди. Улар орасида Килиан Мбаппе, Орельен Тчуамени, Браҳим Диас ва турнирнинг ҳал қилувчи босқичигача етиб бориши мумкин бўлган бошқа футболчилар ҳам бор.

Шу тариқа, «Реал»нинг Ла Лига янги мавсумидаги биринчи учрашуви, эҳтимол, 22–23 август кунлари «Эспаньол» майдонида бўлиб ўтадиган баҳс бўлади.