Англия терма жамоаси сардори Харри Кейн жаҳон чемпионатлари тарихида пенальтиларни (ўйиндан кейинги пенальтилар сериясидан ташқари) энг кўп аниқ амалга оширган футболчига айланди.

ЖЧ-2026да англиялик ҳужумчи мундиаллардаги фаолияти давомида олтинчи пенальтини голга айлантирди ва шу тариқа Аргентина терма жамоаси сардори Лионель Мессига тегишли рекордни ортда қолдирди.

Айни вақтда Кейн ҳисобида жаҳон чемпионатларида 7 та уринишдан 6 та аниқ пенальти (86 фоиз) мавжуд.

Рейтингнинг юқори қисми қуйидагича кўриниш олган:

- Харри Кейн — 6/7 (86%);
- Лионель Месси — 4/7 (57%);
- Криштиану Роналду — 4/5 (80%);
- Эйсебио — 4/4 (100%);
- Габриэль Батистута — 4/4 (100%).

Кейн ўзининг навбатдаги пенальти голини ЖЧ-2026 1/8 финалида Мексикага қарши баҳсда урди. У 60-дақиқада 11 метрлик жарима зарбасини аниқ бажариб, ҳисобни 3:1 кўринишига олиб келди.

Якунда Англия драматик кечган учрашувда 3:2 ҳисобида ғалаба қозониб, чорак финалга йўл олди.

Кейн Англия терма жамоаси билан мундиалдаги иштирокини давом эттираётгани сабабли ушбу рекордни янада яхшилаш имкониятига эга.