«Манчестер Юнайтед» клуби Мадриднинг «Реал» жамоаси ярим ҳимоячиси Орельен Тчуаменини сотиб олиш борасида узил-кесил қарорга келди.

Журналист Хосе Феликс Диаснинг хабар беришича, Англия гранди раҳбарияти франциялик футболчининг трансферини шунчаки устувор вазифа эмас, балки жиддий зарурият деб ҳисобламоқда. «Қизил иблислар» ярим ҳимоячи учун «улкан» сумма таклиф қилишга тайёр. «Қаймоқранглилар» 26 ёшли футболчи учун 100 миллион евродан кўпроқ маблағ талаб қилиши тахмин қилинмоқда.

Transfermarkt портали Орельен Тчуаменининг трансфер қийматини 70 миллион еврога баҳолаган. Футболчининг «Реал» билан амалдаги шартномаси 2028 йилнинг ўрталарига қадар мўлжалланган. Якунланган мавсумда таянч ярим ҳимоячиси мадридликлар сафида 49 та ўйинда майдонга тушиб, 2 та гол урди ва 2 та голли узатмани амалга оширди.