«Фулхэм» ўзининг расмий сайтида Альваро Арбелоа бош мураббий лавозимига тайинланганини эълон қилди. 43 ёшли испаниялик мутахассис Марку Силванинг ўрнини эгаллади ва 2029 йилнинг ёзига қадар амал қиладиган уч йиллик шартномага имзо чекди.

Арбелоа 13 январдан бери «Реал»ни бошқариб келаётган эди ва 2025/26 йилги мавсум якунида клубни тарк этди. Мадрид жамоаси унинг қўл остида 86 очко жамғариб, Испания чемпионати турнир жадвалида 2-ўринни эгаллади. Испаниялик мутахассис бошқарувида жамоа 28 та ўйин ўтказди: 18 та ғалаба, 2 та дуранг ва 8 та мағлубият.

«Фулхэм» 2025/26 йилги мавсумда 52 очко тўплаб, жадвалда 11-ўринни эгаллаган эди. 2 июнь куни Лондон клуби Марку Силва бош мураббийлик лавозимини тарк этганини эълон қилганди.