Мексика президенти Клаудия Шейнбаум ҳукумат 2029 йилги клублар ўртасидаги Жаҳон чемпионатини ўтказиш бўйича аризани қўллаб-қувватлаш қарорини қабул қилишдан олдин, 2026 йилги Жаҳон чемпионатининг иқтисодий ва туристик самарасини баҳолаб чиқишини маълум қилди. Ушбу ташаббус Мексика футбол федерацияси томонидан расман таклиф этилган.
Шейнбаумнинг сўзларига кўра, ҳар қандай қарор мамлакат учун шароитлар қанчалик қулай бўлишига боғлиқ.
«Биз доимо Мексика учун манфаатли шартларни излашимиз керак. Бу бутун мамлакат учун яхши бўларди, аммо конкрет вазиятларни кўриб чиқиш лозим», — деди президент.
Яқин вақт ичида Туризм вазирлиги 2026 йилги Жаҳон чемпионатининг туристик оқим ва иқтисодиётга таъсири тўғрисида ҳисобот тақдим этади. Мазкур маълумотлар асосида ҳукумат навбатдаги турнирни ўтказиш учун аризани қўллаб-қувватлаш ёки йўқлигини белгилайди.
2026 йилги Жаҳон чемпионати учун амалга оширилган модернизация туфайли мамлакат ФИФАнинг қатъий талабларига жавоб берадиган жаҳон даражасидаги инфратузилмага эга: ВАР тизими, замонавий алоқа воситалари ва ривожланган меҳмонхоналар тармоғи. Дастлабки босқичда бешта стадион кўриб чиқилмоқда: финални ўтказиш учун асосий номзод деб ҳисобланган, 80 мингдан ортиқ томошабинга мўлжалланган Мехикодаги «Ацтека» стадиони; Жаҳон чемпионатида ишлаш тажрибасига эга бўлган Монтеррейдаги «BBVA» ва Гвадалахарадаги «Акрон» стадионлари; шунингдек, муқобил вариант сифатида Монтеррейдаги «Университарио» ва Мехикодаги Олимпия стадиони. Сўнгги иккита стадион озгина оператив яхшиланишларни талаб қилиши мумкин.
Шу билан бирга, 2029 йилги клублар ўртасидаги Жаҳон чемпионатини ўтказишга Бразилия, Қатар ва АҚШ каби давлатлар аввалроқ қизиқиш билдирган эди. Бундан ташқари, Испания ва Марокашнинг қўшма аризаси ҳам шакллантирилмоқда.
