Марокаш терма жамоаси ҳужумчиси Браим Диас 2026 йилги жаҳон чемпионати 1/4 финали доирасида Францияга қарши кечадиган баҳс ҳақида ўз кутишларини билдирди. Учрашув бугун, 9 июль куни Тошкент вақти билан соат 01:00 да бошланади.
«Мен доимо масъулиятни ўз зиммамга оламан ва босимдан завқ оламан. Бу ҳар бир футболчи иштирок этишни истайдиган ўйинлар ва мен бунга тайёрман. Эртанги ўйин олдидан ўз кучимга ишонаман ва биз бор кучимизни ишга солишимизни биламан.
Жамоадошларим менга жуда катта ёрдам беришмоқда, чунки биз жуда аҳил гуруҳмиз. Биз мусобақа фаворитларидан бирига қарши майдонга тушамиз, аммо биз ҳам Францияга рақобат кўрсата оладиган даражадамиз ва соврин учун даъвогарлар қаторидамиз. Эртага ғалаба қозонишни истаймиз. Биз бор имкониятимизни ишга солиб, нималарга қодир эканимизни кўрсатамиз», — дея Диаснинг сўзларини келтиради ФИФА расмий сайти.
2026 йилги жаҳон чемпионати 11 июндан 19 июлга қадар АҚШ, Канада ва Мексикада бўлиб ўтмоқда. Амалдаги жаҳон чемпиони — Аргентина терма жамоаси. 2022 йилда Қатарда бўлиб ўтган турнир финалида улар Франция терма жамоасини пенальтилар сериясида 4:2 (асосий вақт 3:3) ҳисобида мағлуб этганди.
