Швейцария терма жамоаси бош мураббийи Мурат Якин Жаҳон чемпионати — 2026 да ҳакамлар томонидан Аргентина терма жамоасига ёрдам берилаётганини кўрмаётганини айтди. Швейцариялик мутахассиснинг сўзларига кўра, ўйинлар ҳалол ўтмоқда, мағлуб бўлган жамоалар вакилларининг ўйиндан кейинги гаплари эса шунчаки ҳиссиётларга асосланган.
«Ҳозир ҳамма нарсани технологиялар ва ВАР ёрдамида назорат қилиш мумкин. Мен у ерда бирор бир ёмон ёки салбий ҳолат юз беряпти, деб айтмаган бўлардим. Ўйиндан кейинги баёнотлар билан ҳисоб-китоб қилиб ўтириш керак эмас», — Якиннинг сўзларини келтиради Ole нашри.
Аргентина ва Швейцария мундиал ярим финалининг сўнгги йўлланмасини ўзаро ўйинда ҳал қилишади. Дастлабки икки йўлланмани Франция ва Испания қўлга киритди. Учинчи йўлланма эса Англия ва Норвегия қарама-қаршилигида аниқланади.
