Англиянинг «Манчестер Юнайтед» клуби «Брайтон» ярим ҳимоячиси Карлос Балебага қизиқиш билдираётганига қарамай, айни пайтда унинг трансфери устида фаол иш олиб бормаяпти. Бу ҳақда Manchester Evening News нашри хабар тарқатди.
Аввалроқ «Манчестер Юнайтед» Орельен Тчуаменини ўз сафига қўшиб ололмагач, унинг ўрнига Кобби Майнунинг ўйин услубини тўлдира оладиган таянч ярим ҳимоячи сифатида Балеба номзодини кўриб чиқаётгани ҳақида хабарлар тарқалган эди. Бироқ сўнгги маълумотларга кўра, жорий трансфер мавсумида ушбу футболчи бўйича ҳеч қандай жиддий ҳаракат амалга оширилмаган ва бу келишув клуб учун устувор вазифа ҳисобланмайди.
Қайд этилишича, манкунианликлар Каземиронинг ўрнини босиш учун анъанавий таянч ярим ҳимоячисини сотиб олиш фикридан воз кечган. Клуб раҳбарияти айни пайтда Премьер-лига талабларига жавоб бера оладиган, техник жиҳатдан кучли, ҳаракатчан ва жисмоний сифатларга эга бўлган ўйинчиларни қидирмоқда. Шунингдек, жамоа мураббийлар штаби ўтган мавсумнинг иккинчи ярмида ярим ҳимоянинг чуқурроқ чизиғида ўз ўйинини сезиларли даражада яхшилаган Кобби Майнунинг имкониятларига тўлиқ ишонч билдирмоқда.
