Angliyaning «Manchester Yunayted» klubi «Brayton» yarim himoyachisi Karlos Balebaga qiziqish bildirayotganiga qaramay, ayni paytda uning transferi ustida faol ish olib bormayapti. Bu haqda Manchester Evening News nashri xabar tarqatdi.

Avvalroq «Manchester Yunayted» Orelyen Tchuamenini o‘z safiga qo‘shib ololmagach, uning o‘rniga Kobbi Maynuning o‘yin uslubini to‘ldira oladigan tayanch yarim himoyachi sifatida Baleba nomzodini ko‘rib chiqayotgani haqida xabarlar tarqalgan edi. Biroq so‘nggi ma’lumotlarga ko‘ra, joriy transfer mavsumida ushbu futbolchi bo‘yicha hech qanday jiddiy harakat amalga oshirilmagan va bu kelishuv klub uchun ustuvor vazifa hisoblanmaydi.

Qayd etilishicha, mankunianliklar Kazemironing o‘rnini bosish uchun an’anaviy tayanch yarim himoyachisini sotib olish fikridan voz kechgan. Klub rahbariyati ayni paytda Premyer-liga talablariga javob bera oladigan, texnik jihatdan kuchli, harakatchan va jismoniy sifatlarga ega bo‘lgan o‘yinchilarni qidirmoqda. Shuningdek, jamoa murabbiylar shtabi o‘tgan mavsumning ikkinchi yarmida yarim himoyaning chuqurroq chizig‘ida o‘z o‘yinini sezilarli darajada yaxshilagan Kobbi Maynuning imkoniyatlariga to‘liq ishonch bildirmoqda.