Лондоннинг «Арсенал» клуби ҳужумчи Хулиан Альварес трансферини муваффақиятли якунлаш учун фаол ҳаракатларни давом эттирмоқда. Бу ҳақда таниқли инсайдер Мигель Делани хабар бермоқда.
Манбанинг қайд этишича, айни пайтда томонлар ўртасида трансфернинг молиявий шартлари бўйича жиддий келишмовчиликлар мавжуд. Лондон клуби раҳбарияти аргентиналик футболчи учун 90 миллион фунт стерлингдан ортиқ маблағ тўлашдан бош тортмоқда. Ўз навбатида, Мадриднинг «Атлетико» клуби ҳужумчининг трансферини камида 100 миллион фунт стерлинг этиб белгилаган ва бу суммадан камига рози бўлмоқчи эмас.
Маълум қилинишича, ушбу трансфер музокараларини «Атлетико» клуби спорт директори Андреа Берта шахсан ўз назоратига олган ҳолда олиб бормоқда.
