Londonning «Arsenal» klubi hujumchi Xulian Alvares transferini muvaffaqiyatli yakunlash uchun faol harakatlarni davom ettirmoqda. Bu haqda taniqli insayder Migel Delani xabar bermoqda.
Manbaning qayd etishicha, ayni paytda tomonlar o‘rtasida transferning moliyaviy shartlari bo‘yicha jiddiy kelishmovchiliklar mavjud. London klubi rahbariyati argentinalik futbolchi uchun 90 million funt sterlingdan ortiq mablag‘ to‘lashdan bosh tortmoqda. O‘z navbatida, Madridning «Atletiko» klubi hujumchining transferini kamida 100 million funt sterling etib belgilagan va bu summadan kamiga rozi bo‘lmoqchi emas.
Ma’lum qilinishicha, ushbu transfer muzokaralarini «Atletiko» klubi sport direktori Andrea Berta shaxsan o‘z nazoratiga olgan holda olib bormoqda.
