Германия терма жамоасининг собиқ футболчиси Матс Хуммельс Брель Эмболонинг четлатилиши Швейцария ва Аргентина ўртасидаги жаҳон чемпионати чорак финалининг бурилиш нуқтаси бўлганини таъкидлади.
Ҳисоб 1:1 бўлиб турган вазиятда, аллақачон сариқ карточкаси бўлган Швейцария ҳужумчиси майдон марказида Леандро Паредес билан курашда йиқилди. VAR тизими орқали вазиятни кўриб чиққан ҳакам Жоау Пинейру аргентиналик футболчига берилган огоҳлантиришни бекор қилди ва симуляция қилгани учун Эмболога иккинчи сариқ карточкани кўрсатди.
«Аллақачон огоҳлантириш олиб туриб, бундай тарзда симуляция қилиш — бу ақлсизлик. Айниқса, ҳеч қандай хавф туғдирмайдиган вазиятда», — деди Хуммельс Bild нашрига берган интервьюсида.
«Бу ҳақли равишда берилган сариқ карточка. Қандайдир ўйламай қилинган реакция уни симуляцияга қўл уришга мажбур қилди. Ўша вазиятгача Швейцария Аргентинани тарангликда ушлаб турганди, аммо бу эпизод туфайли ҳаммасини бой берди».
Швейцария ўйинни қўшимча бўлимларгача олиб бора олди, аммо якунда 1:3 ҳисобида имкониятни бой берди.
