Испания терма жамоаси ярим ҳимоячиси Алекс Баэна Францияга қарши бўлиб ўтадиган Жаҳон чемпионати ярим финал учрашуви арафасида Ламин Ямални ҳимоя қилиб чиқди. Ярим ҳимоячининг фикрича, «Барселона» вингерининг ўйинини фақатгина урилган голлар сони билан баҳолаш керак эмас.

«Умид қиламанки, Ламин шу пайтгача кўрсатган ўйинини намойиш этади, агар бизга гол ёки ҳал қилувчи узатма билан ёрдам берса, янада яхшироқ бўлади. Аммо менимча, у ажойиб турнир ўтказмоқда», — дея Баэнанинг сўзларини келтиради RNE Deportes.

«Эҳтимол, одамлар ундан ҳар бир ўйинда учтадан гол уришини кутаётгандир, Ямал бунга қодир ҳам. Бироқ у жамоага ҳимояланишда ҳам жуда катта ёрдам бермоқда».

«У майдонда кўзга ташланмайдиган жуда кўп ишларини бажаради. Менинг назаримда, Ламин бу чемпионатда ажойиб ўйин кўрсатмоқда».

Жорий Жаҳон чемпионатида 19 ёшли Ямал Испания терма жамоасининг барча ўйинларида иштирок этиб, битта голга муаллифлик қилди. Бундан ташқари, у муваффақиятли алдаб ўтишлар (дриблинг) сони бўйича турнир етакчиси ҳисобланади.