Бельгиялик ярим ҳимоячи Торган Азар эркин агент сифатида «Ланс»га қайтди. Бу ҳақда Франция клубининг расмий сайти хабар бермоқда.

Футболчи клуб билан 2028 йилнинг ёзига қадар мўлжалланган меҳнат шартномасини имзолади.

Торган Азарнинг бундан олдинги клуби Бельгиянинг «Андерлехт» жамоаси эди. Якунланган мавсумда ярим ҳимоячи 46 та ўйинда майдонга тушиб, 15 та гол урди ва 11 та голли узатмани амалга оширди. Transfermarkt сайти маълумотларига кўра, футболчининг жорий бозор қиймати 2 миллион еврони ташкил қилади.

Футболчи «Ланс» тарбияланувчиси ҳисобланади, у ушбу клуб тизимида 2007 йилдан 2012 йилгача бўлган. Бундан ташқари, бельгиялик ўйинчи фаолияти давомида Дортмунднинг «Боруссия», Мёнхенгладбахнинг «Боруссия», ПСВ ва бошқа бир қатор жамоаларда тўп сурган.