2018 йилги жаҳон чемпиони, Франция терма жамоаси собиқ ҳимоячиси Рафаэль Варан футбол бўйича 2026 йилги Жаҳон чемпионатида миллий жамоанинг иштироки ҳақидаги таассуротлари билан ўртоқлашди.
«Жаҳон чемпионати якунига яқинлашмоқда ва бундай ҳиссиётларни қайта бошдан кечириш нақадар қувонарли. Биз футболни айнан шунинг учун севамиз: у бизни бирлаштиради, иштиёқ уйғотади ва ўзига хос лаҳзаларни биргаликда яшашга имкон беради. Франция терма жамоасининг ярим финалга чиқиши футболимизнинг юқори савиясини яна бир бор тасдиқлайди. Турнир давомида жамоа катта иқтидор, совуққонлик ва характер намойиш этди. Ҳал қилувчи дамларда бирлаша олиш ва қийинчиликларни мардонавор енгиб ўтиш — буюк жамоаларни ажратиб турадиган жиҳатлардир.
Биз жамоа қандай қилиб яхлит бир бутун бўлаётганини ва етакчилар ўз зиммасига масъулият олаётганини кўряпмиз. Бунга ёрқин мисол сифатида Килианнинг сардорлик ролини тўлиқ зиммасига олганини келтириш мумкин. Келинг, бизга бундай кучли ҳиссиётларни тақдим этаётган бу лаҳзаларни қадрлайлик, чунки улар бебаҳодир. Бу ёрқин кечинмалар учун раҳмат. Бугун кечқурун кўришгунча... ва умид қиламанки, якшанба куни ҳам!» — деб ёзди Варан Х ижтимоий тармоғидаги саҳифасида.
Франция ва Испания ўртасидаги ярим финал учрашуви 14 июль куни Тошкент вақти билан соат 23:59 да бошланади.
