"Локомотив" - "Насаф" учрашувидан кейинги матбуот анжуманининг иккинчи қисмида мезбонлар бош мураббийи Ҳаким Фузайлов иштирок этди.

— Чемпионатдаги медаллар учун курашдаги асосий рақибимиз устидан қозонилган ғалабадан хурсандман. Чемпионлик учун курашишда давом этамиз. Умуман олганда, ўйин оғир кечди. "Насаф" яхши жамоа, таркибида яхши футболчилар жамланган. Улар бизнинг дарвоза олдида бир қатор вазиятлар яратишди. Деярли тенг ўйинда, бизга омад кулиб чиқди.

— Бугун Холматовнинг ўйини негадир яхши чиқмади.
— У ўйинни яхши бошлаганди. Пенальтидан фойдалана олмагани туфайли тушкунликка тушиб қолди, шекилли. Боз устига, у ўзининг майдондаги асосий рақобатчиси Геворкяндан ортда қола бошлади. Шунинг учун унинг ўрнига Жасур Ҳасановни туширдим.

— Иван Нагаевнинг ўйинига қандай баҳо берасиз?
— У Ўзбекистон терма жамоасининг жавоб баҳсида захира тушиб ўйнагани унга фойдали бўлди. У билан ўйиндан олдина суҳбатлашганимизда, уни албатта майдонга туширишимни айтгандим. У ўзи ўйнаган 30 дақиқа давомида самарали ўйин кўрсатди.