«Барселона» вингери Руни Барджи ёзги трансфер ойнасида Каталония клубини тарк этиши мумкин. Энтони Гордон ва Карим Адейеми сотиб олинганидан сўнг, бош мураббий Ханс-Дитер Флик швециялик футболчининг хизматларига эҳтиёж сезмаяпти ва клуб унинг жамоадан кетиш вариантлари устида ишламоқда, деб хабар беради Mundo Deportivo.

20 ёшли футболчига Бундеслига, Эредивизе, Лига 1, Португалия Суперлигаси ва Серия А жамоалари қизиқиш билдирмоқда. Номзодлар қаторида «Астон Вилла», «Сандерленд», «Эвертон», «Фулхэм», «Брайтон», «Лидс Юнайтед», «Аякс», «Марсель», «Порту», «Ювентус» ва Дортмунднинг «Боруссия» клублари тилга олинмоқда.

Манба берган маълумотларга кўра, Барджининг ўзи ижара вариантини афзал кўрмоқда ва «Барселона»ни бутунлай тарк этишни истамаяпти. Клуб эса ўз навбатида трансферни жамоанинг 27 июль куни Англияда бошланадиган мавсумолди йиғинига қадар якунлашни режалаштирган. Бундан бир йил аввал каталонияликлар швед учун 2,5 миллион евро тўлашган эди.