«Тоттенхэм» ва Испания терма жамоаси ўнг қанот ҳимоячиси Педро Порронинг «Барселона»га ўтиши даргумон.
Mundo Deportivo хабарига кўра, 26 ёшли футболчи «кўк-анорранглилар» президенти Жоан Лапорта ва спорт директори Декуга ёқади, аммо трансфернинг амалга ошиши жуда кам эҳтимол. Яқинда футболчи «шпорлар» билан шартномасини узайтириб, маошини ошириб олган. Шунингдек, каталонияликлар клуби ҳимоянинг ўнг қанотида шошилинч кучайтиришга эҳтиёж йўқ деб ҳисоблайди.
Педро Поррога Ла Лиганинг яна бир гранди — Мадриднинг «Реал» клуби ҳам қизиқиш билдирмоқда. Transfermarkt портали баҳосига кўра, латералнинг бозор қиймати 35 миллион еврони ташкил этади, унинг «Тоттенхэм» билан янги шартномаси 2031 йилгача мўлжалланган.
