Жаҳон чемпионати-2026 финалида Аргентина ва Испания терма жамоалари 96 йиллик мусобақа тарихида илк бор чемпионлик узукларини қўлга киритиш учун майдонга тушади. Бу ҳақда The Athletic портали хабар берди.
Жаҳон кубоги ва олтин медаллардан ташқари, чемпионларга 30 та эксклюзив узук топширилади. ФИФА буни «Американинг энг таниқли спорт анъаналаридан бирини жаҳон футболига олиб кириш» деб атади.
Узукнинг бир томони ЖЧ кубоги тасвири билан, иккинчи томони эса ғолиб жамоа учун махсус дизайнда безатилади. Финалдан сўнг мураббий ва сардорга вақтинчалик нусхалар топширилади, асосий узуклар эса кейинроқ тайёрланади. Шунингдек, мухлислар учун 1996 та узук сотувга чиқарилади.
Финал 19 июль куни бўлиб ўтади. Амалдаги чемпион Аргентина ярим финалда Англияни, Испания эса Францияни мағлуб этганди. Ўйинга АҚШ президенти Дональд Трамп ташриф буюради ва унинг кубокни топшириши кутилмоқда.
