«Ан-Наср» «Мальорка» ярим ҳимоячиси Саму Кошта билан таркибни кучайтиришни режалаштирмоқда. Футболчи жамоани тарк этган хорватиялик Марсело Брозовичнинг ўрнини босиши кутилмоқда.
Фабрицио Романо хабарига кўра, Кошта Европада қолиш имконияти бўлишига қарамай (25 ёшли ўйинчига «РБ Лейпциг» даъвогарлик қилган), трансферга рози бўлди.
Криштиану Роналдунинг ҳамюрти ва бўлажак жамоадоши бўлиши кутилаётган Кошта 2023 йилнинг ёзида «Альмерия»дан «Мальорка»га 3 миллион евро эвазига ўтган эди. Уч йил ичида унинг бозор қиймати беш баробарга ошди.
Кошта 2026 йилги жаҳон чемпионатида ҳам иштирок этишга улгурди. У гуруҳ босқичида Колумбияга қарши кечган баҳсда ўйин тугашига 20 дақиқа қолганида майдонга тушди ва самарали ҳаракатлари билан ажралиб турмади.
Аввалроқ, Яқин Шарқдаги ҳарбий можаролар сабабли юзага келган молиявий қийинчиликлар фонида «Ан-Наср» Брозовичга ўринбосар излашни тўхтатиб тургани хабар қилинганди.
