ФИФА президенти Жанни Инфантино ташкилот раҳбарлиги учун яна бир бор номзодини қўйиш ниятида эканини расман тасдиқлади.
Инфантино ўзининг Instagram саҳифасида миллий футбол ассоциацияларига билдирилган ишонч учун миннатдорлик билдириб, ҳозирнинг ўзидаёқ ФИФАнинг 200 дан ортиқ аъзоси унинг номзодини қўллаб-қувватлаганини маълум қилди.
«Менга билдирилган ишонч ва қўллаб-қувватлов учун миннатдорман. ФИФАнинг 200 дан ортиқ аъзоси 2027 йили Канаданинг Ванкувер шаҳрида бўлиб ўтадиган ФИФА конгрессида қайта сайланиш учун номзодимни қўйиш ниятимни эълон қилганимдан сўнг менинг номзодимни қўллаб-қувватлашини маълум қилди.
Биз биргаликда футболнинг улкан тижорий салоҳиятини янада ривожлантиришда, янги имкониятлар яратишда ва ҳар бир мамлакат орзу қилиши, рақобатлашиши ҳамда муваффақият қозониши мумкин бўлган келажакни барпо этишда давом этамиз», — деб ёзди Инфантино.
Эслатиб ўтамиз, Жанни Инфантино ФИФАга 2016 йил февралидан буён раҳбарлик қилиб келмоқда. У ташкилот президентлиги учун навбатдаги сайловларда ҳам иштирок этишини расман маълум қилди. Сайлов 2027 йил 18 март куни Марокашда бўлиб ўтади. Агар Инфантино қайта сайланса, у ФИФАга 2027–2031 йиллар давомида раҳбарлик қилади.
