«Ал-Ҳилол» ўнг қанот ҳимоячиси Жоау Канселунинг «Барселона»га ўтиши ҳозирча кечиктирилмоқда.
Diario Sport хабарига кўра, Саудия клуби бош мураббийи Симоне Индзаги футболчига ишонч билдирмаяпти, португалияликнинг ўзи эса Каталонияга қайтишни истамоқда. Бироқ Ар-Риёд клуби футболчини арзонлаштирилган нархда сотишга рози эмас. «Кўк-анорранглилар» трансфер учун 10 миллион евродан камроқ маблағ сарфлашни режалаштиришмоқда, аммо ҳозирча расмий таклиф билан чиқишганича йўқ.
Жоау Канселу ўтган мавсумнинг иккинчи ярмида «Барселона»да ижара асосида ўйнаган эди. 32 ёшли футболчининг «Ал-Ҳилол» билан амалдаги шартномаси келгуси йилнинг ўрталаригача мўлжалланган.
