Лондоннинг «Арсенал» клуби Вильям Салиба оғир жароҳат олганидан сўнг марказий ҳимоя чизиғини кучайтириш вариантларини ўрганиб чиқмоқда.

Франциялик футболчи бел қисмидаги жароҳати туфайли бўлажак мавсумнинг деярли бутун биринчи ярмини ўтказиб юбориши мумкин. The Sun Football хабарига кўра, «канонирлар» эркин агентга айланган Жон Стоунсни кузатиб бормоқда. «Манчестер Сити»нинг 32 ёшли собиқ футболчиси Салибага вақтинчалик ўринбосар бўлиши мумкин.

Стоунс «шаҳарликлар» сафида ўн йил давомида тўп суриб, шу вақт ичида Премьер-лиганинг олти карра ғолибига айланган эди. Инглиз футболчисининг шартномаси июль ойи бошида ўз ниҳоясига етди.

Тажрибали марказий ҳимоячига Италиянинг «Интер» ва «Ювентус» клублари ҳам қизиқиш билдирмоқда.