Ламин Ямал Испания терма жамоаси сафида жаҳон чемпиони бўлди. Финалда «қизил фурия» Аргентинани 1:0 ҳисобида мағлуб этди.

Учрашув тақдирини Ферран Торреснинг 106-дақиқада киритган голи ҳал қилди. 19 ёшига келиб Ямал терма жамоалар миқёсидаги энг муҳим иккита турнир — Европа чемпионати ва жаҳон чемпионатини ютишга улгурди. Умуман олганда, ёш юлдузнинг ҳисобида аллақачон саккизта соврин бор.

«Биз жаҳон чемпионлари бўлдик, жуда хурсандмиз ва бахтиёрмиз. Мен яна кўп нарсаларни ютишим керак: иккинчи Европа чемпионати, иккинчи жаҳон чемпионати, «Барса» билан Чемпионлар лигаси», — дея Ламиннинг сўзларини келтиради Barca Universal.

ЖЧ-2026 да «кўк-анорранглилар» вингери саккизта ўйин ўтказиб, битта гол муаллифи бўлди. Финалда у баҳсни бошидан охиригача майдонда ўтказди.