ФИФА Жаҳон чемпионлиги учун кечган ўйин якунланганидан сўнг Аргентина терма жамоаси вакилларининг ҳаракатларини суриштириш ниятида.
Аргентиналиклар ЖЧ-2026 финалида Испанияга имкониятни бой беришди (0:1, қўшимча вақтда).
Жамоалар ўртасидаги финал ўйини якунланиши билан майдонда оммавий мушталашув келиб чиқди.
Аргентина терма жамоаси ва «Атлетико» ҳимоячиси Науэль Молина ёнидан югуриб ўтаётган испанияликлар сардори Родрининг кўкрагига қўли билан урди. «Манчестер Сити» ярим ҳимоячиси тўхтаб, Молинанинг олдига келди ва улар ўртасида даҳанаки жанг бошланди. Бунга бошқа футболчилар, жумладан Леандро Паредес ҳам қўшилди.
Паредес аввалига Испания терма жамоаси ҳимоячиси Эрик Гарсияни тажовузкорона итариб юборди, сўнгра унинг бўғизидан тутди. Жамоадошининг ёнини олиб Гави орага тушди, бироқ «Бока Хуниорс» хавбеки испаниялик ярим ҳимоячини майдон майсасига йиқитди.
Бундан ташқари, Аргентина терма жамоаси мураббийлар штаби аъзоси Роберто Айяла финал ҳакамининг хуштагидан сўнг испанияликлар ярим ҳимоячиси Дани Ольмо билан тортишиб қолди ва кейин унинг юзига урди. Бундан сўнг Эрик Гарсия аргентиналикни қўли билан кўкрагидан енгилгина итариб юборди.
Sky Sports News маълумотларига кўра, ФИФА ушбу эпизодларда аргентиналикларнинг хатти-ҳаракатларини кўриб чиқишни режалаштирмоқда.
